eFlow: Téarmaí agus Coinníollacha Próifíle Mear-rochtana Aip MyTolls

1.1 Is é Bonneagar Iompair Éireann (“BIÉ”) ainm oibriúcháin an Údaráis um Bóithre Náisiúnta (“ÚBN”) i ndiaidh scaoileadh na Gníomhaireachta um Fháil Iarnród agus aistriú a feidhmeanna chuig an ÚBN de réir Acht na mBóithre, 2015.  Is é seo a leanas príomhsheoladh BIÉ - Ionad Gnó Gheata na Páirce, Sráid Gheata na Páirce, Baile Átha Cliath 8, D08 DK10.

1.2 Tá Turas Mobility Services Ireland Limited (“Turas”) ceaptha ag BIÉ chun seirbhísí a sholáthar i ndáil le hoibriú Chóras Dolaí Gan Bhacainn an M50 agus eFlow, lena n-áirítear oibriú na hAipe.

1.3 Sna Téarmaí seo tagraíonn “eFlow”, “muid” nó “ár” do BIÉ, nó Turas atá i mbun eFlow a oibriú thar ceann BIÉ. 

2.1 Sna Téarmaí seo, tá an bhrí seo a leanas leis na focail agus leaganacha cainte seo a leanas mura gceanglaíonn an comhthéacs rud éigin eile:

Ciallaíonn “Táillí Íocaíochta Déanaí” cibé méid is féidir le eFlow a shonrú ó am go ham mar an méid breise atá le híoc agat má theipeann ar eFlow íocaíocht a fháil mar a cheanglaítear faoi na Téarmaí seo.

Ciallaíonn “Bóthar Dola an M50” an chuid sin de bhóthar náisiúnta an N50 (ar a dtugtar an M50 freisin) ar Bóthar Dola é.

Ciallaíonn “Fodhlíthe Dola”, ag am ar bith, na fodhlíthe atá infheidhme maidir le Bóthar Dola an M50 de bhua Achtanna na mBóithre, 1993 - 2023.

3.1 Mura mian leat Cuntas eFlow iomlán, cláraithe a oscailt, féadfaidh tú Próifíl “Mear-rochtana” a oscailt seachas sin, atá le fáil díreach ar an Aip. Ceadaíonn Próifíl Mhear-rochtana duit íocaíochtaí agus aistir ar chuntas ar Aip MyTolls: eFlow a bhainistiú gan gá a bheith ann Cuntas eFlow iomlán, cláraithe a oscailt.   Ba cheart go dtuigfeá, áfach, go bhfuil sealbhóirí Cuntas eFlow atá cláraithe go hiomlán i dteideal táillí dola laghdaithe, agus go bhfuil dolaí d’úsáideoirí Próifílí Mear-rochtana á ngearradh ag an ráta neamhchláraithe fós.   

3.2 Ceadaíonn Próifíl Mhear-rochtana duit an méid seo a leanas: 

1. an rogha clárú do bhrúfhógraí ar an Aip; 

2. creidmheas a chur leis;

3. íocaíochtaí uathoibríocha a shocrú

4. féachaint ar d’iarmhéid;

5. modhanna íocaíochta a chur leis nó a bhaint, cosúil le cártaí creidmheasa nó dochair;

6. suas le feithicil amháin a bhainistiú; 

7. féachaint ar shonraí aistear; 

8. íocaíochtaí a dhéanamh le haghaidh aistir roghnaithe; agus 

9. do Phróifíl Mhear-rochtana a bhainistiú (e.g. pasfhocail, uimhreacha teileafóin agus seoltaí ríomhphoist a athrú).

3.3 Coimeádann eFlow an ceart chun diúltú d’aon iarratas chun Próifíl Mhear-rochtana a oscailt. 

3.4 In imthosca ina ndéanann tú iarratas ar Phróifíl Mhear-rochtana ar an Aip, iarrfar ort na Téarmaí seo a admháil agus aontú leo más mian leat leanúint ar aghaidh. Má chuireann tú tic sa ticbhosca, glacfar leis go bhfuil tú páirteach in agus go nglacann tú leis na Téarmaí seo.

4.1 Más mian leat Próifíl Mhear-rochtana a shocrú, beidh ort iarratas Próifíle Mear-rochtana a líonadh ar an Aip.  I measc na faisnéise atá le cur ar fáil ar fhoirm iarratais na Próifíle Mear-rochtana tá:

1. seoladh ríomhphoist (a bheidh ag feidhmiú mar d’ainm úsáideora freisin), ainm agus uimhir theileafóin phóca;
2. sonraí na feithicle is mian leat a chlárú ar an bpróifíl (cosúil le huimhir an uimhirphláta, déanamh, múnla, dath agus cineál feithicle); agus
3. agus tá rogha agat maidir le - modh íocaíochta beartaithe, i.e. sonraí cárta creidmheasa, cárta dochair nó sparáin dhigitigh (e.g. Apple Pay) agus cibé acu an mian leat díliostáil le haghaidh íocaíochtaí dola uathoibríocha. 

4.2 Tá na sonraí a chuireann tú ar fáil nuair a dhéanann tú iarratas ar do Phróifíl Mhear-rochtana tábhachtach agus ní mór go mbeidís fíor agus cruinn. Má thagann aon athrú ar na sonraí seo, taifead iad trí logáil isteach ar do phróifíl agus cuir d’fhaisnéis in eagar. 

4.3 Nuair a bhíonn sonraí cláraithe d’fheithicle á gcur ar fáil agat dúinn, deimhníonn tú gur tusa an t-úinéir, nó go bhfuil tú údaraithe chun sonraí na feithicle ábhartha a chur ar fáil. 

4.4 Má roghnaíonn tú, nó má chuirtear pasfhocal ar fáil duit nó aon phíosa faisnéise eile mar chuid dár nósanna imeachta slándála, ní mór duit caitheamh lena leithéid d’fhaisnéis mar fhaisnéis rúnda agus níor cheart duit an t-eolas sin a chur ar fáil d’aon tríú páirtí. Aontaíonn tú fógra a thabhairt do eFlow láithreach má chailltear nó má bhaintear mí-úsáid as do phasfhocal. Faoi réir seiceálacha slándála oiriúnacha, beidh ort pasfhocal nua a roghnú nó b’fhéidir go bhféadfaí pasfhocal nua a eisiúint chugat. 

5.1 Trí shonraí do chárta creidmheasa, cárta dochair nó sparáin dhigitigh a chur ar fáil tá údarás á thabhairt agat dúinn chun dolaí/táillí a asbhaint trí úsáid a bhaint as na modhanna íocaíochta seo:

• i gcás íocaíochtaí dola uathoibríocha, de réir agus nuair a thabhaítear na táillí seo; agus
• i gcásanna eile, nuair a logálann tú isteach ar do phróifíl agus nuair a údaraíonn tú íoc na dtáillí dola. 

5.2 Má theipeann ar an modh íocaíochta mar gheall ar aon chúis (de bhrí gur athraigh tú do chárta creidmheasa nó dochair gan fógra a thabhairt dúinn mar shampla) nó mura n-íocann tú na táillí trí mhodh eile, ansin féadfaidh tú Táillí Íocaíochta Déanaí a thabhú, lena n-áirítear fíneálacha nó pionóis bhreise mar atá leagtha amach sna Fodhlíthe Dola.

6.1 Ní mór fógra a thabhairt do eFlow maidir le haon díospóid a bhaineann le táillí a bhíonn le feiceáil ar do Phróifíl Mhear-rochtana laistigh de chaoga (50) lá ón lá a bpostáiltear an táille. Tá gach díospóid faoi réir athbhreithnithe agus ceada ó eFlow agus d’fhéadfadh doiciméid nó fianaise bhreise a bheith ag teastáil uait. Chun críche díospóidí a réiteach, coinníonn eFlow íomhánna fótagrafacha de gach idirbheart ar Bhóthar Dola an M50 i gcomhair tréimhse theoranta.

7.1 Ní bheidh aon oibleagáid ná dliteanas ar eFlow ná ar a ghníomhairí maidir leis an úsáid a bhaineann tú as an Aip nó as do Phróifíl Mhear-rochtana ar an Aip, nó as feidhmíocht a leithéid. Gan dochar don mhéid thuasluaite, ní bheidh eFlow faoi dhliteanas duit maidir le haon chaillteanas brabús, dea-thoil, deis ghnó nó aon chineál caillteanais speisialta nó iarmharach tabhaithe agat, go díreach nó go hindíreach mar thoradh ar an úsáid a bhaineann tú as an Aip nó as do Phróifíl Mhear-rochtana. 

8.1 Féadfaidh tú do Phróifíl Mhear-rochtana a dhúnadh am ar bith. Má tá aon mhodh íocaíochta nasctha le do Phróifíl Mhear-rochtana atá socraithe le haghaidh íocaíocht uathoibríoch, ní mór duit na modhanna íocaíochta seo a bhaint sula ndúnann tú do Phróifíl. 

8.2 Más mian leat Cuntas eFlow cláraithe a oscailt, ní mór duit do Phróifíl Mhear-rochtana a dhúnadh ar dtús. 

8.3 Féadfaimid do Phróifíl Mhear-rochtana a fhoirceannadh láithreach sa chás go bhfuil sárú ábhartha ar aon cheann de na Téarmaí seo i gceist, sa chás nach féidir a leithéid de shárú a leigheas nó, más féidir a leithéid de shárú a leigheas, mura leigheastar a leithéid de shárú laistigh de thríocha (30) lá i ndiaidh do eFlow fógra maidir leis sin a thabhairt duit. 

8.4 D’ainneoin aon fhoirceannadh nó dúnadh do Phróifíle Mear-rochtana, beidh tusa fós freagrach as íoc as aon táille aistir atá le híoc agat. Mura n-íoctar a leithéid de tháillí neamhíoctha le eFlow go pras, beidh tú faoi dhliteanas maidir le Táillí Íocaíochta Déanaí, lena n-áirítear fíneálacha nó pionóis bhreise mar atá leagtha amach sna Fodhlíthe Dola.

8.5 Aisíocfar aon iarmhéid creidmheasa fágtha leat chuig do mhodh íocaíochta roghnaithe nuair a dhéanann tú teagmháil le hIonad Teagmhála eFlow.

9.1 Má theastaíonn faisnéis uait maidir le próiseáil do shonraí pearsanta lena n-áirítear an úsáid a bhainimid as fianáin i ndáil le do Phróifíl Mhear-rochtana, féach ar (i) Fógra Príobháideachais Aip MyTolls: eFlow, (ii) Beartas Fianán Aip MyTolls: eFlow (a bhaineann go príomha leis na sonraí pearsanta a bhailítear agus a phróiseáiltear nuair a thugann tú cuairt ar an Aip) agus (iii) Fógra Cosanta Sonraí eFlow (a bhaineann go príomha leis na sonraí pearsanta a bhailítear agus a phróiseáilte nuair a bhaineann tú úsáid as córas dola gan bhacainn an M50 eFlow), agus tá siad ar fad ar fáil ar an Aip. 

10.1 Déanann tú uiríoll agus barántaíonn tú do eFlow:

1. go bhfuil an fhaisnéis atá curtha ar fáil do eFlow i ndáil leis na Téarmaí seo fíor agus ceart:
2. go bhfuil glactha go bailí agat leis na Téarmaí seo; agus
3. gurb ionann na Téarmaí seo agus do chuid oibleagáidí bailí agus ceangailteacha.

10.2 Seachas mar atá leagtha amach go sainráite sna Téarmaí seo, tá gach uiríoll, baránta, téarma agus coinníoll, cibé acu sainráite nó tugtha le fios i ndáil leis an bPróifíl Mhear-rochtana nó an fhaisnéis atá le fáil anseo, eisiata a mhéid is féidir a cheadaítear de réir an dlí. 

11.1 Má thugann tú faoi deara gur sháraigh tú aon cheann de na Téarmaí seo féadfaimid gníomh ceartaitheach a dhéanamh láithreach lena n-áirítear cosc a chur ort ó rochtain a fháil ar do Phróifíl Mhear-rochtana agus/nó do Phróifíl a dhúnadh agus aon fhaisnéis, sonraí agus ábhar de do chuid ar an Aip a bhaint, am ar bith agus gan fógra a thabhairt. Más rud é gur gortaíodh thú mar thoradh ar do shárú féadfaimid, de réir lánrogha, iarracht a dhéanamh damáistí a aisghabháil nó foirmeacha eile de chúiteamh airgeadaíochta a fháil uait. 

12.1 Féadfaidh eFlow na Téarmaí seo a athrú am ar bith agus cuirfear fógra maidir lena leithéid d’athruithe ar fáil duit sula mbíonn éifeacht leo. Glacfar leis go bhfuil glactha agat le haon athrú dá leithéid laistigh de cheithre lá dhéag (14) i ndiaidh an fhógra a fháil nó nuair a chláraíonn tú idirbheart ar Bhóthar Dola an M50 i ndiaidh dháta an fhógra, cibé acu is túisce.

13.1 Beidh na Téarmaí seo á rialú agus á bhforléiriú de réir dhlíthe na hÉireann agus aontaíonn tú leis seo le dlínse eisiach Chúirteanna na hÉireann.

Más mian leat teagmháil a dhéanamh linn, seol ríomhphost chuig info@eflow.ie nó féach ar níos mó sonraí teagmhála ag https://eflow.ie/contact-us.